Россия ва Хитой раҳбарлари Суриядаги вазиятни муҳокама қилишди

Россия президенти Владимир Путин ва Хитой раиси Си Цзиньпин Гоада бўлиб ўтаётган БРИКС саммити вақтида Суриядаги вазиятни муҳокама қилишди, деб хабар бермоқда РИА “Новости” ахборот агентлиги. 

Бу ҳақда Путин матбуот котиби Дмитрий Песков маълум қилди. 

"Россия президенти ва Хитой раиси Сурия ишлари бўйича фикрлар алмашишди. Путин хитойлик ҳамкасбини у ердаги воқеалар ривожидан хабардор қилди", деб айтди Песков.

Песковнинг айтишича, мулоқот вақтида икки томоннинг "террорчиликка қарши курашиш зарурлиги борасида фикрлар ўхшашлиги" қайд қилинган. Бундан ташқари, Ўрта Осиё ишларига ташқи кучларнинг аралашувига йўл қўйиб бўлмаслигини муҳокама қилишди. Етакчилар Ўрта Осиё ҳудудига халқаро террорчиликнинг киришига қарши ўзаро ҳаракатларни давом эттириш зарурлигини таъкидлаб ўтишди. 

Песковнинг таъкидлашича, Путин ва Си Цзиньпин шунингдек Корея яриморолидаги вазиятга ҳам тўхталиб ўтишди ва у ерда ядровий қуролсизлантириш ўтказиш лозимлигини таъкидлаб ўтишди.