БМТ Мўсулдан чиққан дастлабки 900 қочқин ҳақида маълум қилди

Мўсул шаҳри Ироқ ҳукумат қўшинлари ва коалиция кучлари томонидан қамал қилингач, шаҳардан 900 киши қочиб чиқишга муваффақ бўлди. Бу ҳақда БМТ қочқинлар ишлари бўйича олий комиссари бошқармаси вакиллари BBC нашрига маълум қилган.

Айни вақтда бу қочқинлар Сурия ҳудудида, Ироқ чегараси яқинида ўрнатилган чодирли қароргоҳга жойлаштирилган. Шаҳардаги вазият барқарорлашмагунига қадар қочқинлар шу лагерда қолади.

БМТдагилар қочқинлар қиёфасида Мўсулдан жангарилар чиқиши мумкинлигидан хавотирдалигини билдириб ўтган.

Мўсул шаҳрини қамал қилиш 17 октябрь куни тонгида бошланди. Ироқ ҳарбийлари АҚШ раҳбарлигидаги коалиция ёрдамида 2 йилдан буён ИШИД қўлида бўлган бу йирик шаҳарни қайтариб олишни мақсад қилган.

Шаҳар аввалига артиллериядан ўққа тутилди, кейин зирҳли техникалар жангга киришди. Ҳаводан коалиция самолётлари белгиланган объектларга зарбалар бермоқда.

Пентагон жангарилар тинч аҳоли вакилларидан "жонли қалқон" ўрнида фойдаланиши мумкинлигидан ташвишини билдирган.

2014 йилда жангарилар эгаллаб олганида шаҳар аҳолиси 2 миллион кишини ташкил қиларди. Жангарилар келганидан буён кўп кишилар қочиб кетди, шаҳарда қолганлар сони 700 минг нафарга яқинни ташкил қилади.