АҚШ Мўсулга ҳужум бошланганидан буён ўлдирилган ИШИД жангарилари сонини ҳисоблаб чиқди

17 октябрь куни бошланган Ироқнинг Мўсул шаҳрини озод қилиш ҳарбий операцияси давомида ИШИД террорчилик ташкилотининг 800 нафардан 900 нафаргача бўлган жангариси ҳалок бўлган. Бу ҳақда АҚШ Қуролли кучларининг Яқин Шарқдаги қўмондонлиги раҳбари Жозеф Вотел маълум қилган.

Middle East Online нашрининг генералга асосланиб хабар қилишича, Ироқ армияси ва ҳарбийлашган кучларнинг ҳужумга ўтиши натижасида ИШИД ташкилоти қўшимча кучлар ва ҳатто қуроллар оладиган йўл тўсиб қўйилган.

"Бу пайтга келиб, жангарилар унча катта бўлмаган гуруҳларга бўлиниб кетишган", деди Вотел.

Бундан ташқари, ҳарбий бошлиқнинг маълум қилишича, улар маҳаллий аҳоли вакилларига қўшилиб кетишмоқдаки, бу уларни аниқлаш ва йўқ қилиш вазифасини оғирлаштирмоқда.