«Италия ва мен ҳеч қачон ёлвормаймиз» - Мелони Трампга кескин эътироз билдирди

Politico хабарига кўра, Трамп 18 июнь куни кечқурун Италия оммавий ахборот воситалари билан телефон орқали мулоқот чоғида Мелони ҳақида «мен у билан гаплашганимдан хурсанд бўлган кўринади. Мен бундай қилишга мажбур эмасдим», деди.

Трампнинг қўшимча қилишича, Мелони ўзи билан суратга тушишни «жуда хоҳлаган». «Мен рози бўлмасдим, лекин унга раҳмим келди», деди Оқ уй раҳбари.

Қайд этилишича, бу изоҳлар бош вазирнинг президент билан муносабатлари аввалгидек яхшилигича қолаётгани ҳақидаги сўнгги ваъдаларига зид келади.

Нашрнинг таъкидлашича, ижтимоий тармоқларда эълон қилинган кескин видеода Мелони Трампнинг баёнотини «мутлақо уйдирма» деб атади ва «Италия ва мен ҳеч қачон ёлвормаймиз» деди.

Италия бош вазири президентнинг сўзларидан «ҳайратда қолганини» ва «бу биринчи марта бўлмаса-да... афсуски, [Трамп] Ғарб душманларига қарши курашда худди шундай қатъият кўрсатмаётганини» қўшимча қилди.

Мақолада айтилишича, икки давлат раҳбарлари Эвиандаги уч кунлик G7 саммитида бир неча бор учрашган. Бу апрель ойидаги оммавий тортишувдан кейин биринчи марта юз берди. Шу вақтда Италия бош вазири Трампнинг Папа Леога қарши ҳужумларини «қабул қилиб бўлмайдиган» деб атаганида, бу Америка президентини Мелони «энди мен билган одам эмас» деб айтишга ундади.

Нашрнинг таъкидлашича, италиялик дипломатлардан бири Мелони ва Трампнинг душанба куни кечқурун G7 кечки овқатида бўлиб ўтган биринчи шахсий учрашувини «муносабатларни аниқлаштириш учрашуви» деб таърифлаган.

16 июнь «Катта еттилик»нинг давра суҳбатларидан бирида Европа кенгаши раиси Антониу Коста ҳазиллашиб, улар «яна дўст бўлди», деб айтди. Трамп: «Мени ташлаб кетишди», деб жавоб берди, Мелони эса: «Йўқ, ундай эмас», деб кулди.

Эътиборлиси, 17 июнь куни «Катта еттилик»нинг якуний матбуот анжумани чоғида Мелони журналистларга Трамп билан муносабатлари «эскича қолганини» айтди.

«Доналд Трамп ва мен ўз мамлакатларининг миллий манфаатларини ҳимоя қиладиган анча кучли характерга эга икки кишимиз. Бирор нарсада келиша олмасак, тушунтиришимизга ҳожат йўқ, чунки охир-оқибат бир-биримизнинг нуқтаи назаримизни тушунамиз», деди Мелони.

Нашрнинг таъкидлашича, Италия ҳукуматининг бошқа аъзолари ўз бош вазирини очиқчасига ҳимоя қилган.

«Кимки Жоржа Мелонига ҳужум қилса, у барчамизга ҳужум қилади», деб ёзди Ички ишлар вазири Маттео Салвини Х ижтимоий тармоғида.

Қўшимча қилинишича, ташқи ишлар вазири Антонио Таяни Трампнинг баёнотларини «бутун Италия учун жиддий ва ҳақоратли» деб қоралаб, якшанба куни АҚШга режалаштирилган ташрифини бекор қилган.

Бундан ташқари, мудофаа вазири Гвидо Кросетто ижтимоий тармоқда Мелони кимнидир ўзи билан суратга тушишни сўрашини тасаввур қила олмаслигини ёзди ва Трампнинг «услуби йўқлигидан» афсусда эканини билдирди.