Миллий телеканалларда Шавкат Мирзиёев ҳақида фильм намойиш этилди

ЎзМТРКнинг «Ўзбекистон» ва «Ёшлар» телеканалларида Ўзбекистон президенти вазифасини бажарувчи Шавкат Мирзиёев ҳақидаги ҳужжатли фильм намойиш этилди.
 
Фильм икки қисмдан иборат бўлиб, ҳар бир қисми 20 дақиқадан давом этади. Фильмлар Шавкат Мирзиёевнинг болалиги ва ўсмирлигига бағишланган бўлиб, унинг мактабдаги ўқитувчиларидан олинган интервьюларни ўз ичига олган.
 
Фильмда шунингдек Шавкат Миромоновичнинг Олий таълим муассасидаги оддий ўқитувчиликдан проректорликкача чиқиши ва ниҳоят Ўзбекистон бош вазирига айланиши кўрсатиб ўтилган. Лентада Мирзиёевнинг болалиги ва ўсмирлиги оқ-қора тасвирларда кўрсатилган.

Фильм ўзбек тилида олинган бўлиб, имо-ишора тили ҳам қўшилган. Айни кунларда фильм Youtube порталига жойланган.