Иванка Трамп ишлаш учун Оқ уйга ўтиши мумкинлиги ҳақидаги миш-мишларга ойдинлик киритилди

АҚШ президенти Дональд Трамп қизи Иванка келажакда Оқ уйга ишга ўтиши мумкинлиги ҳақида фикр билдирди.

"Ҳозирда у Вашингтонга кўчиб ўтганидан сўнг, бу ерга мослашиш билан банд. Унинг турмуш ўртоғи Жаред (Кушнер), жуда яхши, ақлли йигит, у офисда (Оқ уйда ишлайди – таҳ.). Бироз вақт кутиб, сўнг нима бўлишини кўрамиз. У – жуда ҳам қобилиятли қиз. Мен бу борада исталган вазият рўй бериши мумкинлигини айтмоқчиман", - деди Трамп АВС телеканалига берган интервьюсида.

Унинг қўшимча қилишича, Кушнер ҳозир “жуда ҳам яхши ишламоқда”.

Аввалроқ Трамп Кушнерни Оқ уйдаги ўзининг катта маслаҳатчиси этиб тайинлаганди. У савдо келишувлари ва Яқин Шарқ масалалари билан шуғулланади. 

Иванка Трампнинг ўзи эса Оқ уйда ишламаслиги хабар қилинган.

АҚШ конгресси вакиллар палатасидаги демократлар гуруҳи АҚШ бош прокурори ва ахлоқ бўйича бошқармадан Трамп куёвининг президент маслаҳатчиси этиб тайинланиши қонунийлигини баҳолашни талаб қилди. АҚШ адлия вазирлиги президентнинг Кушнерни ўз маслаҳатчиси этиб тайинлаш ҳақидаги қарори Америка қонунчилигига, хусусан, “Уруғ-аймоқчилик билан кураш” ҳақидаги қонунга зид эмаслигини маълум қилди.

Маълумот учун, Трампнинг биринчи турмуши вақтида туғилган Иванка Трамп 35 ёшда бўлиб, отасининг Trump Organization компанияси раҳбариятида ишлаган.