Beeline абонентлари жорий йилда интернетдан бепул фойдаланишлари мумкин

Beeline алоқа оператори 2017 йил якунига қадар "яшил" технологиялар, жумладан, қуёш батареяларини жорий этишни режалаштирган. Шунингдек, шу йилнинг охирига қадар, янги глобал VEON интернет-платформаси жорий этилиши ҳам кўзда тутилган. 

Шу муносабат билан Beeline фойдаланувчилари таъриф режаси қандай бўлишидан қатъи назар интернетда мультимедия, овозли қўнғироқлар ва хабарлар юборишни бепул амалга оширишга муваффақ бўлишади. 

VEON платформаси 2016 йилнинг ноябрида Италияда  муваффақиятли ишга туширилди. Ҳисоботда қайд этилишича, 2017 йилнинг охиригача барча мамлакатларда VEON интернет платформаси ишга туширилади. 

“2017 йилда Beeline аввалдаги каби жиддий капитал маблағлар сармоясига эътиборини қаратади. Биз LTE стандартини мамлакатнинг энг йирик шаҳарларида ривожлантиришни, шунингдек “яшил” технологияларни - барчага таниш бўлган база станцияларини тўхтовсиз равишда электр қуввати билан таъминлайдиган қуёш батареяларини жорий этишни режалаштирганмиз. VEON интернет-платформаси эса 2017 йилда ишга тушади. Шуни ишонч билан айта оламизки, у ўзининг функционаллиги ва имкониятлари билан Италияда жорий этилган платформадан фарқ қилмайди”, – дейди Unitel‘нинг техник директори Евгений Ключев.

Эслатиб ўтамиз, 2016 йилнинг IV чораги натижалари бўйича Beeline абонентлари миқдори 9 506 503 кишини ташкил этди, бу эса I чоракдаги натижадан 0,1 фоиз кўп. Бир ой давомида битта мобил абонентига бўлган ўртача ҳисоб (ARPU кўрсаткичи) йилдан йилга 10,4 фоизга – 17 925 сўмгача ўсди. Бунда МОU кўрсаткичи (бир ойда битта абонент томонидан фойдаланилган дақиқалар сони) йил мобайнида 554 дақиқагача ўсди (ўтган йилдаги 501 дақиқага нисбатан (+10,6 фоиз).