Японияда жазирама туфайли мингга яқин киши шифохонага ётқизилди

Япониянинг аксар ҳудудида жазирама об-ҳаво ҳукм сураётгани аҳолининг кекса қатламига салбий таъсир кўрсатмоқда. Бунинг натижасида бир ҳафта мобайнида мингга яқин киши шифохоналарга ётқизилди. Жабрланганларнинг ярмига яқини 65 ёшдан катта кишилардир.

Япония тез тиббий ёрдам хизматининг 15-21 май кунларига доир тақдим этган маълумотларида шу ҳақда сўз боради. Бунда энг жиддий жабрланганлар Токио шаҳри ва Аити, Осака, Хёго, Саитама ва Канагава префектураларида экани таъкидланган.

Япония бош метеорология агентлигига кўра, жазирама об-ҳаво яқин кунларда мамлакатнинг катта қисмида сақланиб туради. Мутахассислар ҳаво ҳарорати юқорилагани сабабли совутгичлардан фойдаланиш, очиқ ҳавода қуёш тиғида кўп қолмаслик ва кўп сув ичишни тавсия қилишмоқда.