Испаниялик альпинист Килиан Жорнет бир ҳафта ичида икки марта Эверест чўққисига кўтарилди, деб хабар бермоқда спортчининг жамоасига иқтибос келтирган ҳолда News New Zealand нашри. Жорнет дунёнинг энг баланд чўққисини икки маротаба забт эта олганидан хурсанд эканлигини айтган.
29 ёшли альпинист Эверестга 22 май куни кўтарилганди. Иккинчи уринишда у чўққига Тибет томондан кўтарилди. Номдор спортчи чўққига 27 май куни 6500 метр баландликдаги лагердан кўтарилишни бошлаган. Кучли шамол ва тез ҳаракатланишнинг имкони йўқлигига қарамасдан, Жорнет ўзини яхши ҳис қилган.
Эътиборлиси, альпинист чўққига икки марта ҳам кислород ниқобисиз чиқа олган.
Таъкидлаш жоизки, бундай баландликда ҳаво жуда сийрак бўлгани сабабли ундаги кислород миқдори ҳам кам бўлади. Эверестга кислород ниқобисиз кўтарилиш амри маҳолдир. Кўпчилик альпинистлар айнан кислород етишмаслигидан ҳам ҳалок бўладилар.
Маълумот учун, Килиан Жорнет тоғларга югуриб чиқиш бўйича маҳоратли спортчи ҳисобланади. У бу спорт тури бўйича кўплаб рекордларни қўлга киритган.
