Путин Францияга келди. Макрон билан Украина масаласи ҳам муҳокама қилинади 

Россия президенти Владимир Путиннинг самолёти Францияга етиб келди. Бу ҳақда Газета.ru хабар берди.

Президент борти Парижнинг халқаро аэропорти – Шарль-де-Голлда қўнган.

Шундан сўнг Владимир Путин Версалга келган. Уни саройга кираверишда Франция раҳбари Эммануэль Макрон кутиб олди. Бу ерда Путин ва Макроннинг музокаралари бошланди, деб хабар бермоқда РИА Новости.

Маълум бўлишича, давлат раҳбарлари музокаралар учун махсус хонага киришганидан сўнг, фотосуратчилар учун махсус суратга тушишган. Кейинчалик Путин ва Макроннинг ёпиқ режимда, матбуотсиз музокаралари бошланган.

Режага кўра, президентлар учрашувдан сўнг матбуот анжуманида журналистларнинг саволларига жавоб қайтаришади. Кремлнинг маълум қилишича, музокараларда асосан икки томонлама муносабатлар, шунингдек, терроризм билан кураш ва Украина масаласи муҳокама қилинади.

Бундан ташқари, Путин ва Макрон “Пётр I. Шоҳ Францияда. 1717 йил” кўргазмасига ҳам ташриф буюради.