Тошкентда агросаноат билан боғлиқ иккита кўргазма очилди

30 май куни Тошкентда Ўзбекистон агросаноати учун замонавий ускуналар ва технологиялар сотиш бўйича XII Халқаро ихтисослаштирилган кўргазма Uzbekistan Agrotech Expo-2017 ҳамда қишлоқ хўжалиги техникаси ва машиналарининг VI Халқаро ихтисослаштирилган кўргазмаси Uzbekistan Agromash ўз ишини бошлади.

Кўргазмалар "Ўзэкспомарказ" павильонларида бўлиб ўтмоқда ва 2 июнгача давом этади.

Кўргазмалар ташкилотчиларининг маълумотларига кўра, Uzbekistan Agrotech Expo-2017 савдо кўргазмасида 16 тадан кўпроқ давлат, жумладан Бельгия, Италия, Германия, Франция, Нидерландия, Жанубий Корея, Туркия, Хитой, Россиядан 53 тадан кўпроқ технология ва ускуналар ишлаб чиқарувчи компаниялар иштирок этмоқда. 

Кўргазмада мева-сабзавот ва гўшт-сут маҳсулотларини қайта ишлаш, ун ва комбикормлар ишлаб чиқаришга мўлжалланган технология ва ускуналар, қадоқлаш ускуналари, чорвачилик ва паррандачиликни ривожлантириш, иссиҳхона хўжаликларини ташкиллаштириш, енгил саноат учун ускуналар, боғдорчилик ва узумчилик учун мини техника ва мини-ускуналар, терини қайта ишлаш, хизматлар кўрсатиш соҳасини ривожлантириш технологиялари, ўсимликларни ҳимоя қилиш кимёвий воситалари, ветеринария воситалари ва бошқалар намойиш қилинади.  

6-маротаба ўтказилаётган Uzbekistan Agromash Eхpo-2017 кўргазмасида жаҳоннинг энг яхши намуналарига жавоб берувчи техниканинг замонавий ва самарали турлари намойиш қилинади. Бу кўргазмада 8 та давлатдан қишлоқ хўжалиги техникасини ишлаб чиқарувчи 14 тадан кўпроқ етакчи компания вакиллари, шунингдек, Ўзбекистоннинг "Агрегат заводи" ва  "Чирчиққишлоқмаш" корхоналари, тижорат банклари ва лизинг компаниялари иштирок этмоқда. 

Кўргазмада Case New Holland (АҚШ), John Deer, CLASS, Lemken каби жаҳоннинг машҳур брендларининг 70 дан кўпроқ техникаси тақдим қилинган.