«Ўзбекконцерт» давлат муассасаси томонидан Тоҳир Содиқов, Азиза Ниёзметова, Шароф Муқимов ҳамда Шерали Бекмуродовнинг лицензияси бекор қилинди.
«Лицензиатлар Тоҳир Содиқов, Азиза Ниёзметова, Шароф Муқимов ва Шерали Бекмуродов билан тузилган лицензия битимининг 4.2.-бандида назарда тутилган шартлар бузилганлиги сабабли, ушбу хонандалар номига берилган лицензиянинг амал қилиши «Фаолиятнинг айрим турларини лицензиялаш тўғрисида»ги Ўзбекистон Республикаси Қонунининг 23-моддаси ҳамда Ўзбекистон Республикаси Вазирлар Маҳкамасининг 2015 йил 9 декабрдаги 354-сон Қарори билан тасдиқланган низомнинг 17-бандига асосан 2017 йил 11 июлдан тугатилганлигини билдирамиз», дейилган «Ўзбекконцерт» матбуот хизмати хабарида.
Маълумот учун, Ўзбекистонда одатда хонандаларнинг лицензиялари улар давлат тадбирларида иштирок этишдан бош тортган ҳолларда олиб қўйилади.
Ўзбекистонда ҳар бир қўшиқчи фаолияти учун лицензия олиши керак, лицензия бир йил муддатга берилади.
Янги тартибларга кўра, хонанда концертларида қўшиқларининг 60 фоизлик қисмини жонли ижрода куйлаши талаби қўйилган.
