Париж аэропортлари хусусийлаштирилиши мумкин

Франция иқтисодиёт вазирлиги Парижнинг Руасси (Шарль де Голль) ва Орли халқаро аэропортини хусусийлаштириш сценарийлари устида ишламоқда, деб хабар бермоқда BFM TV.

Аниқлик киритилишича, Vinci қурилиш корпорацияси эҳтимолий харидор сифатида чиқмоқда. У айни дамда аэропортларни бошқарувчи ADP компаниясида 8 фоизлик акцияларга эга.

Телеканал маълумотига кўра, давлат пакетини ADP’га бутунлай ёки қисман сотиш сценарийлари ишлаб чиқилмоқда. Давлат акциялар тўплами (50,6 фоиз) бутунлай сотиб юбориладиган бўлса, Франция ҳукумати 7 млрд. евро атрофида маблағ олишни мўлжалламоқда. Бошқа сценарийга кўра, давлат ўз улушини 30 фоизга қадар камайтириши мумкин.

Хусусийлаштириш жараёни 2018 йилда амалга оширилиши лозим. Давлатнинг аэропортларда улуш сақлаб қолиши бўйича расмий режалари сентябрь ойидан аввал маълум қилинмайди.