Оскар Де ла Хойя Конор Макгрегорни икки раунддаёқ нокаутга учратишини айтди

Бокс бўйича собиқ жаҳон чемпиони Оскар де ла Хойя Boxingscene нашрига берган интервьюсида ирландиялик аралаш яккакураш жангчиси Конор Макгрегорни икки раунддаёқ нокаутга учрата олган бўлишини айтди.
  
“Флойд Мэйуэзер ҳозир сайёрамиздаги энг яхши боксчидир. Бироқ нима учун у Макгрегорни 2-3 раундда нокаут қила оладиган бир пайтда у билан 10 раунд ивирсиб юрди?”, деб ҳайрат билдирган боксчи. 

44 ёшли собиқ боксчининг айтишича у Макгрегорни икки карра тезроқ нокаут қилган бўларди: “Жангда имкониятлар 50 га 50 бўлди, дейишганда, ҳеч тушунмайман. Охирги йилларда Мэйуэзер энг яхши боксчи-ми? Ҳа. У барча замонларнинг энг яхши 10 боксчиси ичида бўладими? Шубҳасиз. Ва бошқа ҳеч қандай саволлар бўлиши мумкин эмас”.

Де ла Хойя Макгрегор ва Мэйуэзер жангидан олдин бу жангни боксга ҳурматсизлик деб атаганди. 

Де ла Хойя фаолиятида 45 та жанг ўтказиб, ундан 39 тасида ғалаба қозонган, 6 тасида мағлуб бўлган. 2007 йилда у Мэйуэзерга ҳакамлар қарори билан ютқазган. “Олтин бола” охирги жангини 2015 йилда ўтказгач, фаолиятини тугатган.