Босқинчилар жиноят содир этилганидан сўнг қўлга олинди

Фото: Fotolia

2017 йилнинг 18 сентябрь куни тунги тахминан соат 04:30ларда, А.Ю.Р., С.Н.Т. ва К.Ш.А.лар босқинчилик йўли билан ўзганинг мол-мулкини талон-торож қилиш мақсадида, Юнусобод тумани ҳудудида жойлашган институтнинг олдида бўла туриб, фуқаро Д.Ш.Д.нинг ёнига келиб, уни қўл ва оёқлари билан уриб, бахоси 945 АҚШ доллари бўлган мол-мулки ва 1.200.000 сўм миқдоридаги пулларини эгаллаб олишган. Бу ҳақда Тошкент ИИББ хабар берди.

Мазкур ҳолат юзасидан Юнусобод тумани ИИБ ҳузуридаги Тергов бўлими томонидан Ўзбекистон Республикаси ЖКнинг 164-моддаси 2-қисми “б” банди (босқинчилик, яъни бир гуруҳ шахслар томонидан олдиндан тил бириктириб, ўзганинг мулкини талон-торож қилиш мақсадида ҳужум қилиш) аломатлари билан жиноят иши қўзғатилган.

Ҳозирда дастлабки тергов ҳаракатлари давом эттирилиб, уларнинг бошқа жиноятларга алоқадорлиги текширилмоқда.