Туркия Чимён-Чорвоқ сайёҳлик зонасининг истиқболли ривожига ҳисса қўшишга тайёр эканини билдирди

Ўзбекистон Республикаси Туризмни ривожлантириш давлат қўмитасининг ишчи гуруҳи Туркияда «GAD» компанияси раҳбарияти билан бренд, меъморлик ва дизайн ечимларини ишлаб чиқиш, тоғ туризмининг истиқболли ривожи, Чимён-Чорвоқ тоғ-туристик зонасида муҳандислик ишларининг ўтказилиши ва кенг кўламли сайёҳлик инфратузилмасининг қурилиши масалаларини муҳокама қилишди. Бу ҳақида қўмита матбуот хизматида хабар берилди.

Манбага кўра, Туркиянинг «GAD» компанияси дам олиш масканидаги инфратузилмавий лойиҳаларга Туркиядан йирик сармоячиларни жалб қилиш, меҳмонхоналар, маданий-кўнгилочар марказлар, гольф-клублар, аквапарклар ва парклар қурилишида ҳамкорлик қилишга тайёр эканини билдирган.

28 октябрь куни «GAD» меъморий-лойиҳавий компаниясининг раҳбари жаноб Авчиўғли ва бир неча йирик турк сармоячиси Ўзбекистонда бўлганди. Туркиялик экспертлар Ўзбекистонга ташрифи давомида "Tashkent-city" лойиҳаси билан танишув доирасида мамлакат Президенти Шавкат Мирзиёев билан учрашувда қатнашишга муваффақ бўлишганди, шунингдек бош вазир Абдулла Арипов ҳам уларни қабул қилган. 

Хорижий мутахассислар учун Чимён-Чорвоқ туристик зонасига саёҳат ташкиллаштирилган эди.