Нью-Йоркдаги теракт ижрочиси Трампга мурожаат қилган

11 декабрда Нью-Йоркнинг марказий автостанциясида портлашни амалга оширишда гумон қилинаётган Ақойид Юлла терактни содир этишидан бироз олдин АҚШ президенти Дональд Трампга Facebook орқали мурожаат қилган. Бу ҳақда федерал прокурорлар маълум қилди, деб хабар бермоқда Associated Press ахборот агентлиги. 

Пост 11 декабрда ёзилган. Прокурорларнинг айтишича, унда “Трамп, сен ўз халқингни ҳимоя қила олмадинг” деб ёзилган бўлган.

12 декабрда Юллага учта банд: қуролга ноқонуний эгалик қилиш, террорчиликни қўллаб-қувватлаш ва теракт хавфи туғдириш бўйича айблов эълон қилинди.

Теракт оқибатида ҳеч ким ҳалок бўлмаган, террорчининг ўзи ва ён-атрофда бўлган 3 киши жароҳат олган. 

Келиб чиқиши бангладешлик бўлган Юлланинг айтишича, у бомбани ўзи тайёрлаган ва у ёрдамида АҚШга “унинг мамлакатини бомбардимон қилгани учун” зарар етказмоқчи бўлган.