Америкалик аёл 24 йил аввал музлатиб қўйилган ҳомиладан фарзанд дунёга келтирди

АҚШнинг Теннесси штатида яшовчи аёл 24 йил пробиркада сақланган ҳомиладан қиз фарзанд дунёга келтирди. Бу ҳақда CNN телеканали хабар бермоқда.  

Бу ўзига хос рекорд натижа бўлди. Таъкидланишича, аввалги рекорд 2010 йилда ўрнатилган, ўшанда жуфтлик 20 йил пробиркада сақланган ҳомиладан фарзанд кўра олган.

Телеканал маълумотларига кўра, Эмма деб номланган қизча 25 ноябрда Тина ва Бенжамин Гибсонлар оиласида дунёга келган. 1992 йил 14 октябрдан бери музлатилган ҳолда бўлган ҳомила махсус жараён ёрдамида аёлнинг бачадонига киритилган.

Шифокор жуфтликка ҳомиланинг ёшини айтганда улар ҳайрат билдиришган. Тина Гибсон унга ҳомила киритилганда 25 ёшда бўлган. Бундан эса у ўзи дунёга келтирган қизидан расман бир ёшгагина катталиги келиб чиқади.

Жуфтлик Бенжамин касаллик туфайли бепушт бўлгани сабабли бу жараённи ўтказишга қарор қилган. 

Тина телеканал орқали у шунчаки фарзанд кўришни жуда хоҳлаганини айтган. “Бу жаҳон рекордими ёки йўқми, менга фарқи йўқ”, деб айтган бахтиёр она.