Тошкент давлат аграр университети битирувчиларининг тадбиркорлик фаолияти тўлиқ қўллаб-қувватланади

Тошкент давлат аграр университетида жорий йилнинг 23 январь куни Тадбиркорлар ва ишбилармонлар ҳаракати – Ўзбекистон Либерал-демократик партияси Тошкент вилояти Кенгаши томонидан “Микрокредитбанк” акциядорлик-тижорат банки билан ҳамкорликда Ўзбекистон Республикаси Вазирлар Маҳкамасининг “Кичик тадбиркорлик субъектларига микромолиявий ёрдам кўрсатиш, янги иш ўринлари ташкил этиш ва кам таъминланган оилаларга микромолиявий хизматлар кўрсатишни назарда тутадиган лойиҳаларни молиялаштиришга доир қўшимча чора-тадбирлар тўғрисида”ги қарори ижросини таъминлашга қаратилган амалий очиқ мулоқот ташкил этилди.

Мулоқотда O’zLiDeP Сиёсий Кенгаши Ижроия қўмитаси раис ўринбосари Алимов Насимжон Алимов, “Микрокредитбанк” акциядорлик-тижорат банки мутасаддилари Ашур Қодиров, Ирода Қосимова, Абдушукур Холбеков, Шерзод Исломов, Тошкент давлат аграр университети ўқув ишлари бўйича проректори Соҳиб Исламов ва университет Ёшлар иттифоқи фаоллари ҳамда тадбиркорлик фаолиятига қизиқувчи талабалар иштирок этди.

Тадбирдан кўзланган асосий мақсад кичик тадбиркорликни янада кенгайтириш, янги иш ўринлари ташкил этиш учун шароитлар яратиш, якка тартибдаги меҳнат фаолиятини, оилавий тадбиркорлик ва касаначиликни ривожлантириш орқали кам таъминланган оилалар даромадларини ошириш, аҳоли кенг қатламларининг, жумладан, қишлоқ жойлардагиларнинг молиявий ресурслардан фойдаланишини таъминлаш мақсадида тадбиркорлик субъектларига микрокредитлар бериш ва микролизинг хизматларини кўрсатишни яхшилашдан иборатдир.

Мулоқотда таъкидланганидек, партия ва банк ҳамкорлигини янада мустаҳкамлаш мақсадида ҳалқаро ва хорижий молия институтлари ҳамда ташкилотлари билан, шу жумладан, кредит линиялари ва инвестицияларни жалб этиш мақсадида тўғридан-тўғри ҳамкорликни ривожлантириш масалаларига қаратилган бир қатор лойиҳалар амалга оширилиши кўзда тутилмоқда.

 “Фаолиятини бошлаётган тадбиркорлар учун микромолиявий хизматлардан фойдаланиш жойлари, уларнинг кўлами ва ҳажмларини кенгайтириш бўйича 2017-2020 йилларга мўлжалланган чора-тадбирлар дастури”га биноан, тадбиркорлик фаолиятини бошлаётганларга бошланғич капитални шакиллантириш, ўз фаолиятини кенгайтириш учун микрокредитлар ажратиш, тадбиркорлик билан шуғулланиш истагида бўлган битирувчиларининг Start-up лойиҳаларини қўллаб-қувватлашга ҳам алоҳида эътибор қаратилади.

“2018 йил – Фаол тадбиркорлик, инновацион ғоялар ва технологияларни қўллаб-қувватлаш йили” деб эълон қилингинлиги муносабати билан 2018 йилда университетни тамомлайдиган 1374 нафар битирувчи курс талабани ўз мутахассисликлари бўйича ишга жойлашишлари ҳамда ўз йўналишлари бўйича тадбиркорлик фаолиятларини йўлга қўйишларини қўллаб-қувватлаш мақсадида 16 та таълим йўналиши негизида 49 та соҳа бўйича қисқа муддатли ўқув курсларини ташкил этиш режалаштирилган.

Шунингдек, мулоқотда битирувчилар томонидан ўзларини қизиқтирган саволларга “Микрокредитбанк” АТБ ҳамда O’zLiDeP аъзолари томонидан жавоблар берилиб, йўналишларидан келиб чиқиб, юқорида белгилаб олинган вазифаларни ёшлар, хотин-қизлар, умуман аҳолини тадбиркорликка йўналтиришга қаратилган партиявий лойиҳалар орқали амалиётга тадбиқ этишга келишиб олинди.