Эркак машинасини қўйишга халақит қилаётган “Жигули”нинг бир қисмини кесиб ташлади (видео)

Интернетда москвалик бир эркак кўп қаватли уйлар ҳовлисида турган ўзганинг “Жигули” машинасининг орқа қисмини “болгарка”да кесиб ташлаётгани видеоси жадал тарқалмоқда. 

Видеода бошқа бир эркак машинасининг шикастланган бамперини телефонга олаётгани ва сал нарида бошқа бир ҳайдовчи “болгарка” билан нотўғри қўйилган “Жигули” ёнига бориб, унинг халақит қилаётган қисмини кесиб ташлаётганини кўриш мумкин.

Жараённи телефонга олаётган эркак машинани кесиб ташлаётган эркакдан у нима учун бундай қилаётганини сўраганда, “У ҳар доим машинасини шундай қўяди. Мен машинамни бошқачасига яна қандай қўя оламан?”, деб жавоб қилади.

Эркак машинанинг халақит қилаётган қисмини кесиб ташлагач, машинасини ўзига тегишли жойга муаммосиз қўйган.

Ушбу ролик Facebook фойдаланувчилари орасида жадал тарқалди. Видеога берилган изоҳларда кўпчилик ушбу видео саҳналаштирилган, деган фикр билдиришган.