Трамп Путинни Вашингтонга таклиф қилган

АҚШ президенти Дональд Трамп 20 март куни Россия президенти Владимир Путин билан телефон орқали мулоқоти чоғида уни Вашингтонда икки томонлама учрашув ўтказишга таклиф қилган. Бу ҳақда Россия президенти ёрдамчиси Юрий Ушаков хабар қилди.

«Агар ҳаммаси жойида бўлса, умид қиламанки, америкаликлар ўзларининг таклифларини бекор қилишмайди ва саммит ўтказиш имконияти муҳокама қилинади. Президентларимиз телефон орқали мулоқот қилганида, Трамп Вашингтонда, Оқ уйда учрашишни таклиф қилганди», дея Ушаковнинг сўзларини келтирган Риа Новости.

Шу билан бирга, у бундай учрашув йилнинг биринчи ярмида бўлмаслигини қўшимча қилиб ўтган.

«Бундай оғзаки суҳбатдан кейин ишчи характерга ўтиш учун кўп вақт талаб этилади. Қолаверса, бу суҳбатдан кейин ўзаро муносабатларда чигаллик юзага келди - АҚШдан 60 нафар дипломатимиз чиқариб юборилди, бош консулхонамиз ёпилди. Бу қадамга эса Россия томони шундай жавоб қайтарди», дея қайд этган Ушаков.

У шу туфайли 20 март кунги суҳбатдан кейин икки давлат раҳбарининг мулоқоти масаласи кўтарилмаганини қўшимча қилган.

Путин ва Трамп ўзаро икки марта учрашган. Июль ойида президентлар Ҳамбургдаги «Катта йигирматалик» саммити доирасида учрашишганди. Ўшанда Украина ва Суриядаги инқироз муҳокама қилинганди. Сиёсатчиларнинг кейинги учрашуви Данангдаги Осиё-Тинч океани иқтисодий ҳамкорлиги саммитида рўй берди. Бу учрашув вақтида улар Сурия бўйича қўшма баёнот беришганди. Шундан кейин президентлар бир неча марта телефон орқали мулоқот қилишди.