Ким Чен Ин ва Мун Чжэ Ин ўта муҳим декларацияни қабул қилиши мумкин

Корея ярим оролини ядро қуролидан холи ҳудудга айлантириш бўйича декларация КХДР етакчиси Ким Чен Ин ва Жанубий Корея президенти Мун Чжэ Иннинг 27 апрель куни демилитация ҳудудидаги Пханмунжом чегараолди пунктида бўлиб ўтадиган учрашувида қабул қилиниши мумкин. Бу ҳақда Kyodo ахборот агентлиги Жанубий Корея президенти маъмурияти ходимининг сўзларига асосан хабар бермоқда.

"Декларациянинг қабул қилиниши табиий қадам бўлган бўларди, - деди у. – Саммитда айнан ядро қуролидан холи ҳудуд масаласи эътибор марказида бўлади".

Шимол ва Жануб 1992 йилда ҳам шунга ўхшаш ҳужжатни қабул қилганди. У билан ядро қуролини ишлаб чиқиш ва унга эгалик қилиш тақиқланган. Бироқ КХДР кейинчалик бундай мажбуриятлардан воз кечди.

Эслатиб ўтамиз, аввалроқ КХДР ташқи ишлар вазири Озарбойжон ва Россияга йўл олиши хабар қилинганди.