Божхона декларациясини мобил илова орқали расмийлаштириш тартиби янгиланди

Янги тартибга кўра, йўловчи божхона декларациясининг электрон шакли божхона органлари ахборот тизимида мобил илова орқали автоматик равишда шаклланади. Шунингдек, техник хато ва камчиликларни божхона ходими томонидан тузатиш имконияти белгиланди.

Адлия вазирлиги Йўловчи божхона декларациясини тўлдириш ва расмийлаштириш тартиби тўғрисидаги йўриқномага киритилган ўзгартириш ва қўшимчаларни давлат рўйхатидан ўтказди (рўйхат рақами 2606-10, 2026 йил 28 февраль).

Қабул қилинган ўзгартиришларга мувофиқ, фуқароларга қулайлик яратиш мақсадида декларацияда аниқланган техник хатолар божхона ходими томонидан тузатилиши мумкин.

Шунингдек, товар (буюм) 16 ёшга тўлмаган шахсга тегишли бўлган ҳолларда, декларациянинг «товар номи» ва «буюм номи» устунларида буюм (товар) эгасининг паспорт (ID карта) рақами ҳам кўрсатилиши шарт.

Яна бир янгиликка кўра, мобил қурилмалар товарларни олиб киришнинг божхона тўловлари ундирилмайдиган чекланган меъёрлардан қатъий назар декларацияланади. Бундан фақат Тизим оператори базасида рўйхатга олинган ва Ўзбекистон ҳудудида сотиб олинган мобил қурилмалар мустасно.