Трамп Ким Чен Ин билан учрашуви жойи ва санаси ҳали белгиланмаганини айтди

АҚШ президенти Дональд Трамп Шимолий Корея етакчиси Ким Чен Ин билан учрашуви жойи ва санаси ҳали белгиланмаганини маълум қилди. 

“Учрашув ўтиши мумкин бўлган 3-4 та сана ва 5 та жой кўриб чиқилмоқда”, деб айтган Трамп Fox News телеканалига берган интервьюсида.

Аввалроқ Трамп Ким Чен Ин билан учрашув июнь ёки ундан ҳам эртароқ юз бериши мумкинлигини айтганди.

Трампнинг фикрича, МРБ директори Майкл Помпео ва Ким Чен Иннинг учрашуви ажойиб ўтган ва улар чиқиша олишган. Бироқ Вашингтон Пхеньянга бирор-бир ён босишлар қилиш ниятида эмас.

“Биринчидан, Шимолий Корея билан ишлар аъло даражада кетмоқда, кўрамиз ҳаммаси қандай ҳал бўларкин”, деб сўзларини давом эттирган Трамп. У Помпеонинг Шимолий Кореяга ташрифига тўхталиб, “Унинг Ким Чен Ин билан учрашиши кўзда тутилмаганди, бироқ у учрашди”, деб айтган.

“Бу шунчаки саломлашишдан кўпроқ нарса бўлди. Улар чиқиша олишди ва бир соатдан кўпроқ вақт ўтказишди”, деб қўшимча қилган Трамп.

Трамп Шимолий Корея етакчиси билан учрашуви истиқболлари ҳақида гапирар экан, у режалаштирилгандан эртароқ якунланиши ёки умуман бўлмаслиги мумкинлигини айтган. “Эҳтимол, мен бирор сабаб тез кетарман. Шундай бўлиши ҳам мумкинки, учрашув ҳаттоки бўлмаслиги ҳам мумкин, ким билсин?”, деб айтган Трамп. 

Трамп Вашингтон Пхеньянга ён босишлар қилаётгани ҳақидаги гапларга қўшилмаслигини айтган. Унинг аайтишича, аксинча Шимолий Корея ядровий ва ракета синовларини тўхтатиш борасида катта ён босишларга бормоқда.

АҚШ оммавий ахборот воситаларида Трамп ва Ким Чен Ин учрашиши мумкин бўлган жойлар сифатида Швейцария, Мўғулистон ва Шимол ҳамда Жануб ўртасидаги қуролсизлаштирилган ҳудуд келтирилган. Трамп учрашув АҚШда бўлмаслигини айтган.