Дунёда сақланиб қолган энг қадимги печенье сотувга қўйилди 

1805 йилдаги Трафальгар жанги вақтидаги печенье Лондондаги Dix Noonan Webb аукционида 2,6 минг фунт стерлинг (3,6 минг доллар) нарх билан сотувга қўйилди. 

Аукцион уй вакили Оливер Пеписнинг айтишича, у ҳеч қачон бундай нарса кўрмаган. Дунёда сақланиб қолган энг қадимги печенье Defence кемасининг 1-синфдаги матроси Томас Флетчерга тегишли бўлган. У қақшатқич денгиз жангидан кейин печеньени ўзи билан уйга олиб боришга муваффақ бўлган. 

Шундан кейин печенье Флетчерлар оиласида сақланиб келган ва бу оила вакиллари уни 2005 йилда Sotheby's аукционида савдога қўйишган. Пишириқ номаълум бўлиб қолишни истаган бир коллекционер томонидан сотиб олинган.

Аввалги савдодан бери анъанавий рецепт бўйича ун, туз ва сувдан тайёрланган печеньенинг нархи анча ошган. Пеписнинг фикрича, снекнинг нархи 3 минг фунт стерлинггача (4,1 минг доллар) етиши мумкин. 

Маълум қилинишича, бундай печенье консервалар пайдо бўлгунча денгизчилар рационининг муҳим қисми ҳисобланган. Консерваланган гўшт эса флотда 1847 йилдан киритилган.

1805 йилнинг октябрида Атлантика океанида, Трафальгар буруни олдида юз берган жангда инглизлар француз-испан эскадрасини тор-мор келтирганлар. Жанг вақтида инглиз флотига қўмондонлик қилган адмирал Горацио Нельсон ҳалок бўлган.