Туркия С-400’ни харид қилишдан воз кечмайдиган бўлди

Туркия АҚШ сенатининг Анқаранинг F-35 қирувчи самолётини ишлаб чиқариш дастуридаги иштирокини тўхтатиш қарорига қарамай, Россиянинг С-400 зенит-ракета мажмуаларини сотиб олишдан воз кечмайдиган бўлди. Бу ҳақда Туркия ташқи ишлар вазири Мавлут Човушғўлу маълум қилди.    

“Сунъий инқирозлар яратиш – бу Ғарбнинг услуби. Улар хоҳласам сотаман, хоҳламасам сотмайман, деб ўйлайди. Бу нотўғри ёндашувдир, бу муносабатларни инқирозга олиб келади. Биз С-400’ни сотиб олдик ва келинг бу мавзуни ёпамиз”, деб айтган Човушғўлу.   

Човушғўлунинг айтишича, Анқара Вашингтонга F-35 дастури бўйича маблағлар ўтказиб берган ва илк самолётлар унга 21 июнда етказиб берилиши керак эди. Унинг таъкидлашича, С-400’нинг сотиб олиниши “НАТОга зиён етказмайди”.

2017 йил сентябрда Москва ва Анқара Туркияга С-400 тизимларини етказиб бериш бўйича келишув тузган. Келишув қиймати 2,5 млрд долларни ташкил этади, ушбу қийматнинг ярмидан кўпи Россия кредити ҳисобига қопланади.