Султоновнинг «Ўзбекнефтегаз»даги биринчи ўринбосари ва «Ўзбекэнерго» раҳбари жиддий танқидга учради

Ўзбекистон Республикаси Президенти Шавкат Мирзиёев раислигида 21 июнь куни тармоқлар ва ҳудудларда инвестиция лойиҳаларини амалга ошириш ҳолати, тўғридан-тўғри хорижий инвестицияларни жалб этиш ва ўзлаштириш натижалари таҳлилига бағишланган видеоселектор йиғилиши бўлиб ўтди. 

Йиғилишда президент ёқилғи-энергетика соҳасидаги масъулларни лойиҳалардаги қолоқлик учун жиддий танқид қилди.

«Саидов («Ўзбекнефтгаз» компанияси бошқарув раисининг биринчи ўринбосари Улуғбек Саидов - таҳр.). «Муборак газни қайта ишлаш заводи» олтингугурт олиш қурилмасини қуриш бўйича лойиҳаолди ҳужжатлари ҳамда геология қидирув ишлари учун асбоб-ускуналар олиш лойиҳаси бўйича импорт шартномаси ҳали ҳам экспертизадан ўтказилмаган. «Жиззах нефтни қайта ишлаш комплекси», «Шўртан газ-кимё комплекси»ни кенгайтириш бўйича шартномаларни келишиш жараёни чўзилмоқда. 

Саидов, сени эртагаёқ ишдан олиб ташлайман. Сени қандай бу ерга олиб келганимни билишинг керак. Аслида ҳозир қаерда бўлишинг кераклигини ўзинг ҳам биласан. Охирги марта огоҳлантиряпман. Қўлингдан келмаса, кет.

«Ўзбекэнерго» тизимида 4та лойиҳани амалга ошириш кечиктирилмоқда. «Тахиатош иссиқлик электростанцияси — Хоразм нимстанцияси — Саримой аҳоли яшаш жойи (Хоразм вилояти) электр узатиш линияси қурилиши» лойиҳалари бўйича ишлар икки ойга кечикмоқда.

Навоий иссиқлик электр станциясида қуввати 450 МВт бўлган иккинчи буғ-газ қурилмасини қуриш лойиҳасининг қайта ишланган техник-иқтисодий асосини экспертиза қилиш ҳам икки ойдан буён чўзилиб келинмоқда.

Тўрақўрғон иссиқлик электр станциясида қуриш лойиҳаси бўйича табиий газ билан таъминлаш юзасидан тегишли хулоса бўлмагани натижасида лойиҳани амалга ошириш 5 ойга орқада қолмоқда.

Қани Мустафоев? («Ўзбекэнерго» акциядорлик жамияти бошқарув раиси Улуғбек Мустафоев - таҳр.) Қанақа сафарда? Унда биринчи ўринбосари (Руслан Мубаракшин Газизович жавоб беради). Мустафоевга ҳам огоҳлантириш», дея президентнинг сўзларини келтирмоқда «Kun.uz» манбаси.