Москвада ҳеч қандай тушунтиришсиз 30га яқин қирғизистонлик ушланди

Москванинг Таганка туманида полиция Қирғизистоннинг 30 га яқин фуқаросини ушлади. Бу ҳақда муҳожирлар юристи Валентина Чупик маълум қилган.  
      
Чупикнинг айтишича, унга 7 киши ёрдам сўраб мурожаат қилган.

“Ички ишлар бўлимида тахминан 30 киши ушлаб турилибди. Полиция уларнинг ушланиши сабабини тушунтирмаяпти. Улар яримтунга яқин ушланганлар. Менга мурожаат қилган одамлар полиция бўлимида эрталабки соат 6 дан бери қолмоқдалар. Уларни қирғиз бўлганлари учунгина ушлашган. Бу ҳолат Россияда анъанавий тус олган. Қирғизистонликларнинг ушланишига ҳеч қандай асос йўқ”, деб айтган Чупик.  

“Менга ҳужжатлари жойида бўлганлар ҳужжатларини жўнатишларини сўрадим. Буни 7 киши қилди, бироқ бу қолганларнинг ҳамма ҳужжатлари жойида эмаслигини англатмайди”, деб қўшимча қилган юрист.