Германия канцлери Ангела Меркель Дональд Трампнинг Берлин тўлалигича Россия назорати остида эканлиги ҳақидаги сўзларига жавоб қайтарди. У Брюсселдаги НАТО саммитига ташриф буюриши билан баёнот берди, деб хабар қилди Reuters.
«Германиянинг бир қисми Совет Иттифоқи томонидан назорат қилинган даврни ўз бошимдан кечирганман. Бугун биз озод ГФРда ҳамжиҳат эканлигимиздан жудаям хурсандман. Шу боис биз мустақил сиёсат олиб борамиз ва мустақил қарор қабул қиламиз деб айта оламиз», — деди канцлер.
Меркель, шунингдек, нафақат Вашингтон, балки Берлин ҳам НАТО учун кўп нарса қилаётганлигини, хусусан, ҳаракатдаги кучлар борасида АҚШдан кейин иккинчи ўринда туришини таъкидлади.
«Биз Афғонистон бўйича фаол ҳамкорлик қилмоқдамиз. Шу тарзда АҚШ манфаатларини биз ҳам ҳимоя қиляпмиз», — деб қўшиб қўйди у.
Аввалроқ, 11 июль куни Трамп Германия «Шимолий оқим-2» лойиҳасини қўллаб-қувватлагани учун «Россиянинг асири»га айланганини билдирганди. У Европани Россиядан ҳимоя қилиш учун айнан АҚШ пул тўлаётган бир пайтда минтақанинг энг бой мамлакати бўлган ГФР газ қувури қурилишини қўллаб-қувватлаши “ақлга тўғри келмаслигини” таъкидлаганди. У, шунингдек, Берлин пули бўла туриб мудофаа харажатларини оширишга қурби етмаслигидан норози бўлганди.
«Шимолий оқим-2» — Россия ва Германия ўртасидаги газ қувури лойиҳаси бўлиб, у Болтиқ денгизи тубидан ўтади. Лойиҳанинг умумий газ ўтказиш қуввати йилига 55 миллиард кубометр деб баҳоланмоқда. Газ қувури 2019 йил охирида ишга тушиши режалаштирилган.
