Паркент бозори ўрнида янги замонавий савдо мажмуаси қурилиши мумкин

Люксембурглик инвестор Silkroad Investments Тошкент шаҳрида жойлашган «​Паркент»​ ​бозори ўрнида замонавий савдо ва маиший хизмат кўрсатиш мажмуасини қуриш таклифини билдирди. Бу ҳақда Kun.uz мухбири хабар бермоқда.

Жорий йилнинг 14 июль куни Тошкент шаҳар ҳокимиятида Тошкент шаҳар ҳокими ва тадбиркорлар, хорижий инвесторлар иштирокида «Тошкент шаҳрини ривожлантириш ва инвестицияларни жалб қилиш»га бағишланган очиқ учрашув бўлиб ўтди. Тошкент шаҳар ҳокими Жаҳонгир Ортиқхўжаев тадбирга йиғилган ҳар бир тадбиркор ва инвесторларнинг лойиҳалари билан шахсан танишди.

Тадбиркорлардан бири Тошкент шаҳри Яккасарой тумани Ш.Руставелли кўчаси 2-тор кўчаси, 2 уйдан фойдаланиш учун ер майдони ажратилса, 120та янги иш ўрни яратиб, кўп тармоқли кўнгилочар савдо маркази қуришни режалаштираётгани ҳақида айтиб берди. Маълум қилинишича, лойиҳанинг умумий қиймати 36 миллиард сўмни ташкил этади. Уни қуриб-битказиб, 2019 йилнинг IV чорагигача ишга тушириши мумкинлигини таъкидланди. Шу билан бирга лойиҳа амалга ошса, йилига 30 миллиард сўм айланма пул маблағлари шаклланиши мумкинлигини тахмин қилди.

​Finland butter хусусий корхонаси томонидан Тошкент шаҳри Чилонзор туманида Европа андозаси асосида тайёрланаётган озиқ-овқат ва қандолатчилик маҳсулотларини аҳолига тақдим этиш ва экспорт салоҳиятини ошириш мақсадида амалга оширилаётган бошқа лойиҳа ҳам намойиш этилди. Лойиҳанинг умумий қиймати 12 миллион АҚШ доллари. Ушбу лойиҳа асосида 100та янги иш ўрни яратилади. Корхона тўла қувват билан йилига 4500 тонна қандолат маҳсулотларини ишлаб чиқариши имкониятига эга бўлиши кутилмоқда.

Шу куни Яшнобод туманида жойлашган «Паркент Универсал»​ бозор ўрнига ташкил этилаётган янги лойиҳа тақдим этилди. Лойиҳа ташаббускорлари Auto Solution МЧЖ люксембурглик инвестор Silkroad Investments ҳисобланади. Лойиҳанинг умумий қиймати 18 миллион доллар бўлиб, амалга оширилган тақдирда 50та янги иш ўрни яратилишини айтилди.