Илон Маск Tesla’дан ҳайдалиши мумкин

Америкалик тадбиркор Илон Маск Tesla компаниясидаги ижрочи директор лавозимини йўқотиши мумкин. Бунга эса у ва Таиландда ғорда қолиб кетган болаларни қутқаришда иштирок этган британиялик ғаввос Верн Ансуорт ўртасидаги можаро сабаб ҳисобланади. 

Ансуорт Маск болаларни қутқариш учун ишлаб чиққан мосламани танқид қилгандан кейин қутқарувчини ҳақорат қилган. Reuters ахборот агентлиги манбаларига кўра, компания сармоячилари Маскнинг бизнесдан чалғиётганидан норози бўлишмоқда. Сармоячиларнинг фикрича, Маскнинг оммавий баёнотлари унга ўз ишини бажаришда халақит қилмоқда ва компания обрўсига путур етказмоқда. Мисол учун, бозор ушбу можарога ўз муносабатини билдиришга улгурди: 16 июлда савдолар бошланиши вақтига Tesla акциялари нархи 318 доллардан 307 долларгача арзонлашиб кетди. Бунинг оқибатида компания 2 млрд доллар йўқотган.   

Маск томонидан ҳақоратланган Ансуорт унинг устидан судга шикоят қилиши мумкин. У 19 июлда Англияга қайтгач, бу борада баёнот бериши кутилмоқда. Tesla акциядорлари ушбу вазиятга изоҳ беришдан бош тортишган. Бироқ компаниянинг йирик акциядорларидан бири Бэйли Гиффорднинг ҳамкори Жеймс Андерсон вазиятга изоҳ беришга рози бўлган. Унинг айтишича, ушбу воқеа жуда афсусланарлидир ва тинчлик билан ҳал қилинишига умид қилади.

Маск танқидни кўтаролмай, дайвер шаънига твиттерда куракда турмайдиган гаплар айтган, бироқ кейинроқ постини ўчириб ташлаган.