Путин АҚШнинг янги санкцияларини изоҳлади

Вашингтоннинг Россияга қарши санкциялари акс самара беради, деди Владимир Путин Финляндия президенти Саули Ниинистё билан учрашувдан кейинги матбуот анжуманида. Бу ҳақда «Интерфакс» хабар бермоқда. У АҚШ раҳбарияти санкциялардан маъно йўқлигини англаб етишига умид билдирди.

«Гап нафақат Қўшма Штатлар президентининг, балки истеблишмент деб аталувчи бошқарувчи синфнинг позициясида ҳамдир. Умид қиламанки, қачондир америкалик ҳамкорларимиз бу сиёсат истиқболга эга эмаслигини англаб етишади ва биз меъёрдагидек ҳамкорликни бошлаймиз», — деди Россия президенти.

Дональд Трамп билан Хельсинкида бўлиб ўтган учрашув ҳақидаги саволга жавоб бераркан, Путин яна бир бор икки давлат раҳбарлари барча баҳсли масалаларни ҳал қила олишмаган бўлса-да, бу учрашувни фойдали деб ҳисоблашини таъкидлади.

«Икки соатлик суҳбат давомида баҳсли деб ҳисобланган барча масалаларни ҳал қилишимизни ҳеч ким кутмаганди ҳам... Президент Трамп бу масалалар бўйича ўз нуқтаи назарини айтди, мен ҳам ўз нуқтаи назаримни айтдим. Аммо фикр алмашиш, тўғридан-тўғри мулоқот ҳар доим жуда фойдали», — дея Путиннинг сўзларидан иқтибос келтиради РИА Новости.

Аввалроқ саноат ва савдо вазири Денис Мантуров ҳукумат АҚШнинг янги санкцияларининг Россия иқтисодиётига таъсирини бартараф этишга тайёрлигини билдирганди. Унинг сўзларига кўра, вазирлар маҳкамаси навбатдаги санкцияларнинг салбий таъсиридан сақланиш имконини берувчи тадбирлар режасини тайёрлаб қўйган. 

«Электроника соҳасида олиш имкони бўлмайдиган таркибий қисмларни ўзимизники билан алмаштирамиз, етишмайдиганларини Жануби-Шарқий Осиё бозорларидан олиб келамиз, бу бозорлар биз учун очиқ», — деди у.

АҚШнинг янги санкциялар пакетини жорий этишнинг биринчи босқичи 22 августга мўлжалланганди. Навбатдаги чеклов чоралари «Скрипаллар иши» — Буюк Британияда Россия разведка бош бошқармаси собиқ полковниги Сергей Скрипаль ва унинг қизининг заҳарланиши билан боғлиқ. АҚШ ва унинг иттифоқчилари бу ишда Кремлни айбламоқда. Санкцияларнинг биринчи босқичида Россияга электроника, хусусан, авиацияда фойдаланиладиган таркибий қисмлар экспортини тақиқлашни кўзда тутади.