“Наманган” эркин иқтисодий зонаси ташкил этилади

Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “Наманган” эркин иқтисодий зонаси фаолиятини ташкил этиш чора-тадбирлари тўғрисида”ги қарори лойиҳаси жойлаштирилди.

Ҳужжатда айтилишча, Ўзбекистон Республикаси президентининг 2018 йил 20 августдаги “Наманган” эркин иқтисодий зонасини ташкил этиш чора-тадбирлари тўғрисида”ги ПФ-5517-сонли Фармонига мувофиқ Наманган вилояти Чуст тумани ҳудудида “Наманган” эркин иқтисодий зонаси ташкил этилган.

Бошқарув ходимлари сони 4 нафардан иборат бўлган “Наманган” эркин иқтисодий зонаси дирекцияси” давлат унитар корхонаси ташкил этилади. Эркин иқтисодий зоналар ва кичик саноат зоналари фаолиятини мувофиқлаштирувчи Республика кенгашига Дирекциянинг тасдиқланган тузилмасига ва ходимлари сонига инвестициялар ҳажми ва эркин иқтисодий зона ҳудудида жойлаштирилган инвестиция лойиҳалари сонига боғлиқлик асосида ўзгартиришлар киритиш ҳуқуқи берилади.

“Наманган” эркин иқтисодий зонаси дирекцияси” давлат унитар корхонаси Наманган вилояти, Чуст шаҳри, Чарағон кўчаси, 1-уй манзилига жойлаштирилади.

“Наманган” эркин иқтисодий зонаси дирекцияси” давлат унитар корхонасининг уставига кўра, “Наманган” эркин иқтисодий зонаси фаолиятини, шу жумладан, “Наманган” ЭИЗни ривожлантириш давлат дастурларининг тўлиқ ва ўз вақтида бажарилишини, “Наманган” ЭИЗ ҳудудида алоҳида ҳуқуқий режимга риоя этилишини таъминлаш йўли билан тезкор бошқариш, шунингдек “Наманган” ЭИЗ ҳудудидаги хўжалик фаолияти қатнашчиларига хизматлар кўрсатишдан ҳамда ушбу Уставда назарда тутилган бошқа ишлар (хизматлар)ни бажаришдан (кўрсатишдан) фойда олиш Дирекция фаолиятининг асосий мақсади ҳисобланади.

Қуйидагилар Дирекция фаолиятининг асосий йўналишлари ҳисобланади:

“Наманган” ЭИЗ қатнашчиларини рўйхатдан ўтказиш ва уларнинг реестрини юритиш, уларга тегишли гувоҳномалар бериш;
“Наманган” ЭИЗ ҳудудида “Наманган” ЭИЗ қатнашчилари ҳисобланмайдиган бошқа хўжалик юритувчи субъектлар ҳисобини юритиш;
белгиланган тартибда танланган инвесторлар билан Наманган вилояти эркин иқтисодий зоналари ва кичик саноат зоналари Маъмурий кенгаши (кейинги ўринларда Маъмурий кенгаш деб аталади) қарорларига мувофиқ “Наманган” ЭИЗ ҳудудида инвестициялаш тўғрисида битимлар,
“Наманган” ЭИЗ ҳудудидаги давлат мулки бўлган фаолият кўрсатмаётган ташкилотларни ва мол-мулкни нулга тенг харид қиймати бўйича сотиш тўғрисида таклифлар киритиш;
белгиланган тартибда танланган инвесторлар томонидан ўз зиммасига қабул қилган мажбуриятларнинг зарур даражада бажарилишини назорат қилиш, кейинчалик унинг натижаларини Маъмурий кенгашга тақдим этиш;
“Наманган” ЭИЗ ҳудудида инвестиция лойиҳаларини амалга ошириш учун хорижий ва маҳаллий инвесторларни қидириш ва жалб этиш;
ишлаб чиқилган “Наманган” ЭИЗ бош режаси ва Маъмурий кенгаш қарори билан маъқулланган инвестиция лойиҳаларини жойлаштириш;
“Наманган” ЭИЗ ҳудудида жойлашган давлат мулки бўлган кўчмас мулк объектларини Дирекцияга берилган ваколатлар доирасида бошқариш;
“Наманган” ЭИЗ қатнашчиларига инвестиция лойиҳаларини ўз вақтида амалга ошириш, ташкилотларни ишга тушириш ва уларнинг фаолияти учун зарур бўлган инфратузилма (электр энергияси, газ ва сув таъминоти, канализация, кириш йўллари ва бошқалар) билан таъминлаш билан боғлиқ масалаларни ҳал этишда кўмаклашиш;
“Наманган” ЭИЗ қатнашчиларига, шу жумладан давлат органларида уларнинг манфаатларини ифодалаш йўли билан хизматлар кўрсатиш;
Маъмурий кенгаш ваколатларига кирувчи масалалар бўйича унинг мажлисларида кўриб чиқиш учун материаллар тайёрлаш;
“Наманган” ЭИЗ фаолиятини тезкор бошқариш бўйича бошқа функцияларни амалга ошириш.

Ўзбекистон Республикаси қонун ҳужжатларида ушбу Уставда назарда тутилган тегишли фаолият турининг лицензияланиши зарурлиги белгиланган тақдирда, Дирекция фаолиятнинг ушбу турини лицензия олмасдан, тегишли лицензияловчи орган билан тузилган лицензия битими асосида амалга оширишга ҳақлидир.