Вьетнамнинг собиқ президенти, 21 сентябрда ҳаётдан кўз юмган Чан Дай Куанг пойтахт Ханойдан 90 км жанубда жойлашган Нинбинь вилоятида дафн этилди.
Дафн маросими Куанг туғилиб-ўсган Кимшон уездидаги Куангтхиен жамоасида ҳарбий эҳтиром билан ўтган. Ундан аввал марҳум президент билан миллий мудофаа вазирлиги мотам залида видолашув бўлиб ўтган.
Ханойда минглаб одамлар миллий байроқ билан ёпилган президент тобутини кузатиб қолган. Шундан кейин тобут Нинбинга етказилган.
Чан Дай Куанг қон саратонининг кам учровчи тури билан оғир курашдан кейин 62 ёшида вафот этди. Унинг ўрнига вице-президент Данг Тхи Нгок Тхинь вақтинчалик тайинланган. Янги президент миллий йиғин аъзолари томонидан сайланади.
