АҚШ президентининг миллий хавфсизлик бўйича маслаҳатчиси Жон Болтон Москвага келди, деб хабар қилди РИА Новости дипломатик манбага асосланиб.
"У Москвага етиб келди",- деди агентлик манбаси.
Аввалроқ Россия ТИВ раҳбари ўринбосари Сергей Рябков АҚШ президентининг ёрдамчиси Москвага келишини, Россия ундан АҚШнинг ракеталар бўйича шартнома борасидаги кейинги қадамлари тўғрисида изоҳ олишни мўлжаллаётганини маълум қилганди.
Болтон ташрифи давомида Россия президенти Владимир Путин ва хавфсизлик кенгаши котиби Николай Патрушев билан учрашади. Душанба куни у Россия ТИВ раҳбари Сергей Лавров билан учрашиши режалаштирилган.
Аввалроқ АҚШ президенти Дональд Трамп Вашингтон ўрта ва кичик масофаларга мўлжалланган ракеталарни йўқ қилиш тўғрисидаги шартномадан чиқиши ҳақида маълум қилганди.
