Беларусь президенти самолёти сотувга қўйилди

Фото: Sputnik / Николай Енин

Беларусь президенти Александр Лукашенко бир вақтлар учган Ту-154М самолёти сотувга қўйилди.

1995 йилда ишлаб чиқарилган, EW-85815 борт рақамига эга самолёт учун савдолар Минск аэропортида 5 декабрда бошланиши режалаштирилган. “Белавиа” авиакомпаниясида самолёт давлат раҳбари томонидан қўллангани ҳақидаги маълумотни тасдиқлаш ёки рад этишга ҳақли эмасликлари айтилган.

“Биз савдога қўйилган самолётнинг кўрсаткичлари ҳақидаги маълумотни бера оламиз”, деб айтган авиакомпания вакили.

Лукашенко самолёти ҳақидаги маълумот унинг Хитойга 2016 йилдаги сафари вақтида пайдо бўлган. Президентга тегишли Ту-154М Новосибирскда қўниб ўтган ва айнан шу ерда қайд қилинган.

Самолётнинг бошланғич нархи 2 млн доллардан кўпроқни ташкил қилади. Савдоларда ушбу суммадан 10 фоиз бўнак киритадиган исталган ташкилот ёки шахс иштирок эта олади.