Австралияда юк поезди машинистсиз ўз ҳолича 100 км йўл босиб ўтди  

Австралия ОАВ иккинчи кун бахтли тасодифгина қурбонларсиз тугаган ноодатий фавқулоддаги вазиятни муҳокама қилишдан тўхтамаяпти. Воқеа 5 ноябрда Ньюман шаҳридан Порт-Хедлендга йўл олаётган юк поезди билан юз берган.

Темир рудаси ортилган юк поезди 268 та вагондан иборат бўлиб, бундай улкан таркибни 4 та тепловоз тортган, бир машинист бошқарган.

Маълум қилинишича, барчаси машинист оралиқ тўхташлардан бирида вагонлардан бирини кўздан кечириш учун кабинани тарк этгандан кейин бошланган. Шу пайт таркиб жойидан қўзғалиб, тезлаша бошлаган ва машинист бунга қаршилик кўрсата олмаган. 

Поезд қия юза бўйлаб кетиб қолгани ёки локомотивлар тортиши оқибатида юриб кетгани ҳозирча номаълум. Таркиб борган сари тезлашиб, машинистсиз ўртача 100 км/соат тезлик билан деярли 100 кмча йўл ўтган.

Поездни ягона усул – релслардан чиқариб юбориш билан тўхтатишга муваффақ бўлинган, акс ҳолда бу воқеа қандай аянчли оқибатларга олиб келишини тасаввур ҳам қилиш қийин.

Поездни қурбонлар бўлмаслиги учун сунъий фалокат йўли билан чўл ҳудудида тўхтатишга муваффақ бўлинган.    

Мутахассисларнинг фикрича, мутасадди идораларда поездни тўхтатиш учун бошқа чора ҳам қолмаган. Поезд 14 минг кишилик Порт-Хедленддан 100 км узоқликда тўхтатилган. 

Таркиб дунёдаги энг йирик тоғ-кон компанияларидан бири, бош қароргоҳи Мельбурнда бўлган BHP компаниясига тегишли бўлган. 

Bloomberg’нинг BHP’га иқтибос келтирган ҳолда маълум қилишича, фалокат оқибатида 1,5 кмлик темир йўл қисмига шикаст етган, уни тиклашга камида бир ҳафта вақт кетади. Ҳозирда бу муаммони ҳал қилиш билан 130 га яқин одам шуғулланмоқда. 

Мутахассисларнинг фикрича, фалокат Австралиядан руда экспортига жиддий таъсир қилади. Мутахассисларнинг ҳисоб-китобига кўра, портда мавжуд бўлган хом ашё захиралари уни етказишдаги ушланишларнинг ўрнини қоплолмайди.  

Мутахассисларнинг баҳолашича, хом ашё етказилиши тўхтаб қолиши сабабли компания ҳар куни 55 млн долларгача зарар кўради.