Порошенко Париждан туриб Донбасс аҳолисини сайловларда иштирок этмасликка чақирди

Ҳозирда Биринчи жаҳон уруши якунланганининг 100 йиллиги нишонланаётган Парижда қолаётган Украина президенти Пётр Порошенко Донбасс ҳудудидаги тан олинмаган Донецк ва Луганск халқ республикаларида 11 ноябрда халқ кенгашлари раҳбарлари ва депутатлари сайловлари ўтказилиши муносабати билан ушбу ҳудудлар аҳолисига мурожаат қилди.  

Порошенко “босиб олинган ушбу ҳудудларда” яшовчи украиналикларни сайловларда овоз бермасликка чақирган. “Ўз овозингизни берманг. Сохта сайловларда иштирок этманг”, деб айтган Порошенко. 

“Россия буни ўзигагина хос тарзда, қотилликлар, қийноқлар, қонунбузарликлар содир этган аввалги қўғирчоқларини дастлаб йўқ қилиш, сўнгра аввалдан тайинлаб бўлинган кейинги қўғирчоқларини тайинлаш учун қилмоқда”, деб айтган Украина президенти.     

Порошенко Украина бунга қатъий қаршилик кўрсатишини айтган. “Украина оккупация қилинган Донбасс ва Қримни қайтариб олиш учун барча чораларни кўради. Бутун дунё ҳозир биз, украиналиклар билан”, деб таъкидлаб ўтган Порошенко.  

“Биз бу сайловлар ҳеч ким томонидан тан олинмаслигига ишончимиз комил. Бу сайловлар босиб олинган ҳудудда Россия автоматлари стволи остида ўтказилмоқда. Уларга қатъиян йўл қўйиб бўлмайди”, деб қўшимча қилган Украина президенти.  

Порошенконинг айтишича, сайловларнинг ноқонуний ўтказилиши Европа Иттифоқи ташқи ишлар вазирлари йиғилиши ва Европа кенгаши вазирлари қўмитаси йиғилиши кун тартибига киритилади.

Бу орада Украина хавфсизлик хизмати ушбу сайловларнинг қандай натижа билан якунланиши олдиндан ҳал қилиб қўйилганини маълум қилган.

“Бизнинг маълумотларга кўра, “ДХР”да Пушилин ғалабаси учун 55 фоиз, “ЛХР”да Пасечник ғалабаси учун 63 фоиз овоз берилади. Сайловлардаги иштирок 70 фоизни кўрсатиши керак”, деб айтган Украина хавфсизлик хизмати раҳбари Василий Грицак.