Трамп Путин билан учрашувни бекор қилиши сабаби ҳақидаги саволга жавоб беришни истамади

Ҳозирда “Катта йигирматалик” саммитида иштирок этаётган АҚШ президенти Дональд Трамп Россия президенти Владимир Путин билан учрашувни бекор қилишига нима сабаб бўлгани ҳақида россиялик журналистлар берган саволга жавоб беришни истамади.

Журналистлар Трампга бу саволни Япония бош вазири Синдзо Абэ билан музокараларга кетаётганда беришган. Бироқ у саволни жавобсиз қолдирган. Бу вақтда Трамп ва Абэ ўртасида музокаралар борадиган хона яқинида Путин Франция президенти билан учрашув ўтказаётган бўлган.

Дастлаб Путин ва Трамп алоҳида учрашув ўтказиши режалаштирилганди, бироқ Трамп учрашувни бекор қилди. Трамп буни Россия Украинага Керчь бўғозида ушланган кемалар ва денгизчиларни қайтармагани билан тушунтирган. АҚШ президентининг фикрича, икки томонлама учрашувни бу вазият ҳал қилингандан кейин ўтказган маъқулроқ бўлади.

Оқ уй матбуот котиби Сара Сандерснинг маълум қилишича, Трамп учрашувни бекор қилиш ҳақидаги якуний қарорни АҚШ давлат котиби Майк Помпео, Оқ уй аппарати раҳбари Жон Келли ва миллий хавфсизлик бўйича маслаҳатчиси Жон Болтон билан учрашувдан кейин қабул қилган.