Путин Трампни мустақиллик билан табриклаб, Россияга таклиф этди

4 июль АҚШ мустақиллиги куни муносабати билан Россия президенти америкалик ҳамкасби Доналд Трампга қўнғироқ қилиб, байрам билан табриклади. Рус матбуотига кўра, Путин табригини Россиянинг Америка давлатчилигига қўшган ҳиссасини эслатиш билан бошлаган. Қўнғироғи давомида Путин Трампни Россияга ҳам таклиф этди.

Россия президенти ўз қўнғироғида Иккинчи жаҳон уруши йилларидаги иттифоқчиликни ҳеч қачон унутмаслик кераклигини билдирган. Мустақилликнинг 250 йиллиги муносабати билан Трамп дабдаба ташкил қилолганини юқори баҳолаган.

Рус медиасига кўра, шу йилнинг ўзида тўртинчи бор ўтказилаётган бу телефон суҳбати фақат протокол даражасидаги эмас, ишчан руҳда ўтди. Расмийларнинг тасдиқлашича, суҳбат қарийб 1,5 соат давом этган.

Россия президенти ёрдамчиси Юрий Ушаковга кўра, суҳбатда табрикдан ташқари икки давлат сиёсий мавзулари муҳокама қилинган. Шулардан бири – Украина уруши. АҚШ президенти жанговар ҳаракатларни тезроқ тўхтатиш, ҳарбий инқирозни енгиб ўқиш бўйича тинч ечимлар топишга кўмаклашишга тайёрлигини тасдиқлади, дейди Ушаков.

Трампнинг махсус вакиллари  Уитков ва Жаред Кушнер воситачилик саъй-ҳаракатларини давом эттиришади ва қулай вақтда Москвага келишга тайёр бўладилар, дея қўшимча қилади президент ёрдамчиси.

Россия томони ҳам можарони сиёсий-дипломатик йўл билан ҳал этиш, лекин ўз принципларидан воз кечмаслигини билдирган.

Рус медиасига кўра, Путин жанг майдонидаги ҳақиқий вазият манзарасини чизиб берди. Айтилишича, рус армияси олдинга силжиётгани таъкидланган. Шунингдек, Константиновка устидан Россия назорати ўрнатилгани ҳам эълон қилинди. Киев қолган ҳудудларга қанчалик ёпишиб олмасин, армиямиз уларни албатта эгаллайди, дейди Юрий Ушаков.

Путин ва Трамплар Эрон бўйича ҳам гаплашган. Россия президенти АҚШ ва Эрон ўртасидаги ўзаро англашув меморандумини музокаралар жараёнини тартибга солишнинг ечими деб кўрсатган.

Минтақадаги вазиятни деэскалация қилиш ва барқарорлаштириш бўйича саъй-ҳаракатларга амалий ёрдам кўрсатишга тайёрлигимиз айтилди. Доналд Трамп, ўз навбатида, Россия томонига вазмин позицияси ва конструктив таклифлари учун миннатдорчилик билдирди, деган Ушаков.

Россиядаги ОАВ нинг ёзишича, яқин кунларда Бойқўнғир космодромидан Халқаро космик станцияга қўшма Россия-Америка экипажининг учирилиши рамзий маънога эга. Футбол бўйича жаҳон чемпионати ҳақида ҳам тўхталиниб, Путин Трампга муваффақият тилаган.

Президентлар яқин фурсатда яна қўнғироқлашишга келишди, Путин Трампда Россияга келиш учун доимий расмий таклиф борлигини эслатди, дейди Россия президентининг ёрдамчиси.

Эслатиб ўтамиз, Путин 14 июнь, Трампнинг туғилган куни муносабати билан ҳам телефон қилиб, уни табриклаган эди. Россия томонига кўра, мустақиллик табриги таклифи АҚШ дан чиққан.