Тўппонча билан қуролланган кекса эркак Болгария президенти қабулхонасига бостириб кирди

Фото: Twitter/News of България

Тўппонча билан қуролланган 71 ёшли пенсионер Болгария президенти Румен Радев қабулхонасига бостириб кирди. Бу ҳақда БТА ахборот агентлиги хабар берди.

Таъкидланишича, эркак президент маъмурияти ходимларига дўқ-пўписа қилган. Воқеа 3 декабрда юз берган.

Жандармерия ходимлари эркакни қўлга олишган ва ҳозирда уни буни қилишга ундаган сабабларни аниқлаштиришмоқда.

Радевнинг ўзи иш жойида бўлмаган. У бу пайт БМТнинг иқлим масалалари бўйича анжумани ўтаётган Польшада бўлган.