София Россияга қарши янги чекловларга қарши чиқди

Радев бу ҳақда 18 июн куни Брюсселда бўлиб ўтган Европа Иттифоқи йиғини олдидан журналистлар билан мулоқотда маълум қилди. Унинг сўзларига кўра, янги санкциялар Болгария учун стратегик аҳамиятга эга бўлган бир қатор соҳаларга жиддий таъсир кўрсатиши мумкин.

Хусусан, бош вазир мамлакатдаги ёнилғи бозорининг муҳим иштирокчиларидан бири бўлган «Лукойл» компанияси фаолияти хавф остида қолишидан хавотир билдирди. Компания Болгариядаги ягона нефтни қайта ишлаш заводига эгалик қилади ҳамда мамлакатда мотор ёнилғиси сотувининг катта қисмини таъминлайди.

«Лукойл» фаолияти учун жиддий хавф мавжуд. Биз компанияни санкциялар рўйхатидан чиқаришни хоҳлаймиз», — деди Радев.

Шунингдек, у янги чекловлар София метрополитени учун эҳтиёт қисмлар етказиб беришда муаммолар келтириб чиқариши, шу билан бирга қишлоқ хўжалиги учун зарур бўлган ўғитлар таъминотига ҳам таъсир кўрсатиши мумкинлигини таъкидлади.

Болгария раҳбари таклиф этилаётган санкциялар Россия Православ черкови раҳбари — патриарх Кириллга нисбатан ҳам қўлланиши режалаштирилаётганига қарши эканини билдирди. Унинг фикрича, бу масала қўшимча муҳокамани талаб қилади.

«Бу санкциялар шу вақтгача урушни қай даражада тўхтатди? Улар тинчлик ўрнатишга қай тарзда ёрдам берди?» — деди Радев.

Шу билан бирга, Болгария бош вазири мамлакат Украинанинг Европа Иттифоқига аъзо бўлиш бўйича музокараларини қўллаб-қувватлашини таъкидлади.

Европа Иттифоқи 15 июн куни Россияга қарши санкциялар рўйхатини янада кенгайтириб, унга 34 нафар жисмоний ва 47 та юридик шахсни киритган эди. Янги чекловлар Россия ҳарбий-саноат комплекси билан боғлиқ компаниялар, нефт экспорти билан шуғулланувчи ташкилотлар ва «соя флоти» билан алоқадор тузилмаларга нисбатан жорий этилган.

Санкциялар рўйхатига Россия, Туркия, Либерия, Бирлашган Араб Амирликлари, Озарбойжон ва Ҳонгконгда фаолият юритувчи қатор компаниялар, шунингдек, Россиянинг айрим жамоат ва диний арбоблари ҳам киритилган.