Британия россиялик жосусларни бир неча қотилликларга алоқадорликда гумон қилмоқда

Буюк Британия ҳукумати Россия бир қатор шов-шувли ўлимларга алоқадорлигини гумон қилмоқда. Бу ҳақда The Sunday Times нашри хабар берган.

Сергей Скрипаль ва унинг қизи Юлияга уюштирилган суиқасдни текшираётган мутахассислар расмий Москва камида икки кишининг ўлимига алоқадорлигини кўрсатадиган далилларни аниқлашган: бизнесменлар Александр Перепеличний ва Скот Янг.

«Текширувлар шуни кўрсатмоқдаки, Россия разведкаси ходимлари сирли ўлимлар рўй берган вақтда мамлакат ҳудудида бўлишган, улар ўлимлардан олдин келиб, ўлимлардан кейин кетишган.  Бир қанча шов-шувли ўлимлар, жумладан Перепеличний ва Янгнинг ўлимлари жуда шубҳали тарзда рўй берган», — дея ёзади газета. 

Сергей Скрипаль ва унинг қизи Юлия шу йилнинг 4 мартида Солсберида заҳарланишганди. Буюк Британия ҳукумати бу суиқасдда Россияни айблаган, расмий Москва барча айбловларни рад этган.

Bellingcat ва The Insider тадқиқотлари натижаларига кўра, бу суиқасдни содир этишда гумон қилинганлардан бири бўлмиш Боширов аслида Россия ҳарбий разведкаси полковниги Анатолий Чепига ҳисобланади, иккинчи гумондор Петров эса — ҳарбий врач, у аслида ГРУ ходими Александр Мишкиндир.

Перепеличний 2012 йили Британиянинг Вейбриж шаҳрида ўлдирилган. У Сергей Магнитскийнинг Россия қамоқхонасида вафот этиши иши бўйича Ғарб давлатлари билан ҳамкорлик қилганди. Терговчилар ушбу бизнесмен заҳар билан ўлдирилганини гумон қилишган.

Мультимиллионер Скот Янг 2014 йилда вафот этган. Оммага у банкротликдан кейин ўзини ўлдиргани айтилган, аммо айрим талқинларга кўра унинг ўлими дўсти Борис Березовскийнинг ўлдирилиши билан боғлиқдир.