Песков Путин қачон бошқа етакчилар билан мулоқот қилишга рад жавобини беришини маълум қилди 

Россия президентининг матбуот котиби Дмитрий Песков “Россия 1” телеканалидаги “Москва. Кремль. Путин” кўрсатувида Россия президенти Владимир Путиннинг халқаро телефон мулоқотлари қандай юз беришини сўзлаб берди.

Аввалроқ Украина президенти Пётр Порошенко Керчь бўғозидаги воқеадан кейин Владимир Путин билан боғланишга уринишлари бесамар кетаётганидан арз қилган. 

“Президентнинг алоқа каналларига эга ёрдамчилари бор. Айнан уларга оддий телефон орқали телефон мулоқоти ўтказиш таклифи етказилади. Бундай таклифлар баъзида қабул қилинади ва шунда икки президентнинг вақтини мослаштиришга ҳаракат қилинади. Гоҳида эса бу таклифлар қабул қилинмайди”, деб тушунтирган Песков. Киев Керчь бўғозидаги воқеадан кейин неча марта телефон мулоқоти ўтказишни сўрагани Кремлда маълум қилинмади.

Ушбу вазиятга Путиннинг ўзи ҳам изоҳ берган. Унинг айтишича, у гап Порошенко билан гаплашишни истамаётганида эмас. “Гап шундаки, мен унинг сайлов кампаниясида иштирок этмоқчимасман”, деб айтган Путин ва буни қуйидагича тушунтирган: Порошенко муаммоли ва иғвогар вазиятларни юзага келтириб, бунда барча айбни Россияга юклайди; сўнгра у бу муаммоларни қанчалик муваффақиятли ҳал қилаётганини кўрсатишга уринади. “Мана оддийгина комбинация ва мен бу комбинацияларда иштирок этишни истамайман ва иштирок этмайман ҳам”, деб кескин жавоб қилган Путин.