Xiaomi смартфондек келадиган фотопринтерни тақдим қилди

20 декабрда Хитойнинг Xiaomi компанияси янги қурилмаси – митти фотопринтерни тақдим қилди. Таъкидланишича, шу кундан бошлаб Xiaomi Mijia Photo Printer деб номланган қурилмани компаниянинг расмий сайтидан жуда паст нархда – 72 долларга сотиб олиш мумкин.  

Компанияда таъкидланишича, қурилмага буюртмалар олина бошлангач 2 соат ичида ундан 10 мингта сотилган.  

Янги принтернинг асосий жиҳати унинг ихчамлигидадир. Бунинг эвазига уни ўзи билан саёҳатга ҳам олиш мумкин. У ўлчамлари бўйича замонавий смартфонлар кабидир ва биргина ўчириш/ёқиш тугмачасига эга. Принтер ишлай оладиган қоғознинг максимал формати А5’ни ташкил қилади. Компанияда таъкидланишича, фотопринтер билан ишлашда яхши сифатдаги суратлар олиш, зарурат бўлганда эса унда ҳужжатларни босиш мумкин.

Принтерда 300 х 300 dpi сифатидаги суратларни олиш мумкин. У смартфон ёки планшет ёрдамида Mijia дастури орқали бошқарилади.

Принтер учун 40 та суратни олишга мўлжалланган тўплам 8,5 доллар туради, яъни бир дона сурат 20 центга тушади. 

Компанияда ихчам принтер ташриф қоғозлари, фотокарточкалар, откриткалар босиш учун жуда қўл келиши, бу эса энди ишини бошлаётган тадбиркорларда қизиқиш уйғотиши мумкинлиги айтилган.