Шахмат бўйича собиқ жаҳон чемпиони Владимир Крамник фаолиятини якунлашини эълон қилди 

Россиялик шахматчи, 2000 йилда жаҳон чемпиони унвонини қўлга киритган Владимир Крамник фаолиятини якунлашини эълон қилди. У 7 йил давомида жаҳон чемпиони унвонини ўзида сақлаб келган.

43 ёшли шахматчи бу ҳақда Нидерландиянинг Вейк-ан-Зее шаҳрида ўтган Tata Steel Chess мусобақаси сайтида маълум қилган. Крамник мусобақа якунларига кўра охирги 14-ўринни эгаллаган.

“Мен профессионал шахматчи сифатидаги фаолиятимни бир неча ой олдин якунламоқчи эдим. Мен учун охирги мусобақадан кейин бу ҳақида расман эълон қилишим мумкин. Менинг фаолиятим ажойиб саёҳат бўлган ва шахмат менга берган барчаси учун ундан миннатдорман”, деб айтган Крамник.

Крамник жаҳон чемпиони унвонини 2000 йилда Гарри Каспаровни мағлуб этгандан кейин қўлга киритган. Россиялик 2000 йилдан 2006 йилгача Профессионал шахмат уюшмаси  версияси бўйича жаҳон чемпиони бўлган. 2006 йилда Халқаро шахмат федерацияси Профессионал шахмат уюшмаси билан жаҳон чемпионлари унвонларини бирлаштиришга қарор қилган: мутлақ чемпион учун учрашувда Крамник болгариялик Веелин Топаловни мағлуб этган.

Крамник Россия терма жамоаси сафида Жаҳон шахмат Олимпиадасида уч марта ғолиб бўлган, жаҳон ва Европа чемпионатлари олтин медалини қўлга киритган. Крамник умумий ҳисобда 50 дан кўпроқ мусобақада ғолиб бўлган. У чемпионлик унвонини 2007 йилда ҳиндистонлик Вишванатан Анандга бой берган.