Коллежлар умумий сонида энг катта улуш қайси шаҳарлар ҳиссасига тўғри келмоқда?

Фото: sovminrk.gov.uz

2018/2019 ўқув йилининг бошига Ўзбекистон Республикасида 1537 та ўрта махсус касб-ҳунар таълими муассасалари фаолият юритмоқда. Улардан академик лицейлар сони 123 тани ва касб-ҳунар коллежлар сони - 1414 тани ташкил этди.

Давлат статистика қўмитаси хабарига кўра, 2017/2018 йиллар бошига 1556 та ўрта махсус, касб-ҳунар таълими муассасалари мавжуд бўлиб, улардан 123 таси академик лицей ва 1433 та касб-ҳунар коллежлари ташкил қилган.

2018/2019 ўқув йили бошига ўрта махсус касб-ҳунар таълим муассасаларининг умумий сонидан, академик лицейлар улуши 8,0%ни ташкил этади, касб-ҳунар коллежлари эса 92,0%ни ташкил этади.

Академик лицейларнинг улуши 2016/2017 ўқув йили бошида 9,2%, касб-ҳунар коллежлари эса 90,8%ни ташкил этган.

Ўзбекистон Республикасида 2018/2019 ўқув йили бошига 123 та академик лицейларда 70,8 минг нафар ўқувчи таҳсил олаётган бўлиб, 31,6 минг нафар ўқувчи таълим муассасаларини битирди. 2017/2018 ўқув йилининг бошида эса 123 академик лицейларда, 85,3 минг нафар ўқувчи таҳсил олган ва 32,7 минг нафар ўқувчи битирган.

Ўзбекистон Республикасида 2018/2019 ўқув йили бошига 1414 та касб-ҳунар коллежлари фаолият юритмоқда, уларда 656,3 минг нафар ўқувчи таҳсил олаётган бўлиб, 454,9 минг нафар ўқувчи таълим муассасаларини битирди.

Касб-ҳунар коллежларининг умумий сонида энг катта улуш Самарқанд, Фарғона, Қашқадарё вилоятлари ва Тошкент шаҳарлари ҳиссасига тўғри келмоқда. Энг кам улуш эса Навоий, Сирдарё, Жиззах ва Бухоро вилоятларига тўғри келади.

Касб-ҳунар коллежлари ўқувчилари орасида қизларнинг улуши 49,9%, ўғил болалар 50,1%ни ташкил этди. Битирувчилар улуши билан таққослаганда, ўғил болаларнинг улуши 50,7%ни, қизлар эса 49,3%ни ташкил этади.

2018/2019 ўқув йили бошига касб-ҳунар коллежлари ўқитувчилари сони 44,0 минг кишини ташкил этди, улардан 41,0 минг нафари олий маълумотли ва 3,0 минг нафари ўрта махсус маълумотга эга.

2017/2018 ўқув йил бошига касб-ҳунар коллежларининг 73,1 минг ўқитувчиси қайд этилди, улардан 68,6 минг нафари олий маълумотли ва 4,4 минг нафари ўрта махсус маълумотга эга бўлган.