Эфиопияда қулаган Boeing 737 Max учувчиси парвоздаги муаммолар ҳақида хабар қилган

Эфиопияда ҳалокатга учраган Boeing 737 Max самолёти учувчиси парвозни бошқаришдаги муаммолар ҳақида маълум қилган ва аэропортга қайтмоқчи бўлган. Бу ҳақда самолётга эгалик қилган Ethiopian Airlines авиакомпанияси бош директори Тевольде Гебремариам маълум қилди. 

Гебремариамнинг таъкидлашича, учувчи диспетчерлар билан мулоқотда самолёт ёки парвоз билан бошқа ташқи муаммолар ҳақида хабар қилмаган. 

Бу орада The New York Times нашрининг маълум қилишича, 2018 йилда АҚШ авиакомпанияларининг камида иккита самолёти экипажи Boeing 737 Max 8 самолёти автопилоти ёқилгандан кейин ўзини олдиндан айтиб бўлмайдиган тутгани ҳақида хабар қилишган.

“АҚШда Boeing 737 Max 8’да парвозларни амалга оширган камида икки учувчи ўтган йил ноябрда самолётлар автопилот ёқилгандан кейин кутилмаганда “шўнғигани” борасида хавотир билдиришган”, деб айтилган нашрда ва иккала ҳолатда ҳам учувчилар автопилотни ўчириб вазиятни ўнглай олишгани қўшимча қилинган.

Учувчилардан бири маълум қилганидек, самолёт автопилот ёқилгандан 2-3 сония ўтгач пастлай бошлаган.

Нашрнинг таъкидлашича, америкалик учувчилар 2018 йил октябрда Индонезиянинг Boeing 737 Max 8 самолёти ҳалокати олдидан юз берган муаммолар каби муаммоларга дуч келишган. 

Айни вақтда Эфиопиядаги ҳалокатдан кейин бутун дунё бўйлаб барча Boeing 737 самолётларининг ярмидан кўпининг парвозлари тўхтатилган.