Россия президенти Владимир Путин ва Туркия президенти Ражаб Тоййиб Эрдўған Кремлда музокаралар олиб борди. Икки давлат раҳбарлари нималар борасида келишиб олишгани ҳақида Kun.uz шарҳида ўқинг.
"Аккую" АЭСи ва "Турк оқими"
Россия президенти Туркиядаги "Аккую" атом электр станцияси қурилишини икки мамлакатнинг энергетика соҳасидаги муҳим лойиҳалардан бири деб атади. Унинг сўзларига кўра, АЭСнинг биринчи блоки 2023 йилда, Туркия Республикасининг юз йиллик юбилейига ишга туширилиши режалаштирилган.
Путин шунингдек, "Турк оқими" газ ўтказгичини ишга туширишга тайёргарликка ҳам эътибор қаратди. Унинг қайд этишича, газ ўтказгич шу йил ишга тушиши учун Туркиянинг Қора денгиз соҳилидаги қабул терминали қурилишини якунлаш лозим.
Эрдўған "Турк оқими"нинг қуруқликдан ўтадиган қисми йил охиригача қуриб битказилишини билдирди.
Россия ва Туркия президентлари газ нархини ҳам муҳокама қилишди. Путин Анқара маълум бир нархни айтаётганини, "Газпром" эса газ нархини бозордан келиб чиқиб белгилашини қайд этди.
Унинг сўзларига кўра, Россия Туркия бозорини қадрлайди ва шу боис бу борада умумий қарорга келинади.
Иқтисодий ҳамкорлик
Путин Россия ва Туркия ўртасидаги савдони кенгайтириш режалари ҳақида ҳам сўз юритди. Унинг фикрича, ҳозирда мавжуд чекловларни бекор қилиш бунга ёрдам беради.
У турк инвесторларининг Россия бозорига қизиқиши ҳақида гапирар экан, Туркия Татаристон иқтисодиётига икки миллиард долларга яқин инвестиция киритганини айтди.
Путиннинг сўзларига кўра, икки давлат ўртасидаги маҳсулот айирбошлаш ҳажми қарийб 16 фоизга ўсган ва 25,5 миллиард доллардан ошиб кетган.
Ҳарбий ҳамкорлик
Россия президенти ҳарбий соҳадаги ҳамкорликни мустаҳкамлаш зарурлигини қайд этди.
"Биринчи ўринда гап С-400 "Триумф" зенит ракета тизимларини етказиб бериш бўйича шартномани амалга ошириш ҳақида бормоқда", — деди Путин.
У шу билан бирга Туркияга ҳарбий маҳсулотлар етказиб бериш бўйча бошқа лойиҳалар ҳам борлигини таъкидлади.
Виза режими
