Амалиётда аксарият давлатлар тез-тез бир-бирларини айблаб келишади. Россия кўп нарсаларда АҚШни айбдор этиб кўрсатса, АҚШ эса аксинча, Россияни кўрсатади. Давлатнинг ички муаммолари ҳақида гапирадиганлар ва мавжуд фактларни тан олувчилар эса озчиликни ташкил қилади.
Мавзунинг долзарблигидан келиб чиқиб, Kun.uz «Сизнинг фикрингиз» Telegram-каналида сўров ўтказди. Сўров онлайн ўтказилганлиги боис жинс, ёш ва бошқа омиллар ҳисобга олинмади. Бундан ташқари, ҳар бир саволга турлича миқдордаги респондентлар жавоб беришди (ўз ихтиёридан келиб чиқиб), яъни бир саволга 50 киши жавоб берган бўлса, бошқасига 65 киши жавоб қайтарди.
Респондентлардан Ўзбекистоннинг асосий ички душмани нима эканлиги сўралди.
1033 респондентдан 58%и Ўзбекистоннинг асосий душмани коррупция эканлигини билдиришди. Шу билан бирга, сўровда қатнашганларнинг 17%и мамлакатнинг асосий душмани маддоҳлик, 15%и – қариндош-уруғчилик, 5%и - маҳаллийчилик, 3%и - волюнтаризм ва 2%и нигилизм дея қайд этди.
Эслатиб ўтамиз, Transparency International халқаро ҳуқуқни ҳимоя қилиш ташкилотининг коррупция индексида Ўзбекистон 158-ўринда жойлашган. Ўзбекистон 2017 йилда 157-, 2016 йилда эса 156-ўринда бўлган.
«Сўнгги икки йил ичида сиз коррупцияга қарши кураш соҳасида ижобий ўзгаришларни кузатдингизми?» деган саволга 754 респондент жавоб қайтарган. Уларнинг 63%и ижобий ўзгаришларни кузатмаганини билдирган, 37%и эса ҳа жавобини берган.
Коррупция ҳолатларига дуч келганлиги ҳақидаги саволга 694 киши жавоб қайтарган. Уларнинг 92%и бундай ҳолатга дуч келганлигини, 8%и эса дуч келмаганлигини билдирган.
Расмий маълумотлар ҳам пора сўраш ҳолатлари мавжудлигини тасдиқлайди. Масалан, Давлат хизматлари агентлиги ва унинг ҳудудий бошқармалари томонидан жорий йилнинг I чорагида 1 318 марта «сирли мижоз» акцияси ўтказилган ва натижада 68 нафар ходим билан меҳнат шартномалари бекор қилинган.
